اسلام آباد: صدر مملکت آصف علی زرداری کو تاجکستان کے صدر امام علی رحمان کا تہنیتی ٹیلی فون۔
تاجک صدر نے آصف علی زرداری کو پاکستان کا صدر منتخب ہونے پر تہہ دل سے مبارک باد پیش کی، دونوں صدور نے باہمی دلچسپی کے شعبوں میں دوطرفہ تعاون مزید مضبوط بنانے کی خواہش کا اعادہ کیا۔
صدر مملکت آصف علی زرداری نے کہا کہ پاکستان برادر ملک تاجکستان کے ساتھ تعلقات کو خصوصی اہمیت دیتا ہے۔ پاکستان اور تاجکستان کے تعلقات مشترکہ مذہب، ثقافت اور تاریخ پر مبنی ہیں۔
آصف علی زرداری کا مزید کہنا تھا کہ دونوں ممالک کے مابین دوطرفہ تعاون مزید بہتر بنانے کیلئے مل کر کام کرنا ہوگا۔
صدر مملکت نے آبی وسائل کے اہم شعبے میں تاجکستان کے ساتھ کام کرنے کی خواہش کا اظہار کیا جب کہ آصف علی زرداری نے رمضان المبارک کے بابرکت مہینے کے آغاز پر تاجک صدر کو مبارکباد بھی پیش کی۔
صدرِ پاکستان نے تاجک صدر کو آنوروز کی آمد پر بھی مبارکباد دی جب کہ تاجکستان کے صدر نے صدر مملکت کو دورہ تاجکستان کی دعوت دی۔
صدر مملکت آصف علی زرداری نے مبارکباد کے پیغام ، نیک خواہشات پر تاجک ہم منصب کا شکریہ ادا کیا۔