کٹھمنڈو: نیپال کے وزیراعظم پشپا کمار داہل پارلیمنٹ سے اعتماد کا ووٹ حاصل کرنے میں ناکام ہوگئے ہیں۔ بھارتی میڈیا کے مطابق نیپال کی پارلیمنٹ میں گزشتہ روز وزیراعظم پشپا کمار داہل پر اعتماد کے لیے قرارداد پیش کی گئی تھی۔ اعتماد کا ووٹ جیتنے کے لیے پشپا کمار داہل کو کم از کم 138 اراکین کی حمایت درکار تھی، تاہم نیپالی وزیراعظم نے 275 کے ایوان میں صرف 63 ووٹ حاصل کیے۔ بھارتی میڈیا رپورٹس کے مطابق نیپال کے وزیراعظم کو مخالفت میں 194 ووٹ ملے۔
رپورٹس میں یہ بھی بتایا گیا ہے کہ نیپالی وزیراعظم کے پارلیمنٹ سے اعتماد کا ووٹ حاصل نہ کرنے کے بعد، اب سیاسی رہنما کے پی شرما اولی کی قیادت میں نئی اتحادی حکومت تشکیل دی جائے گی۔ نیپال 2008 سے بادشاہت کے خاتمے کے بعد سے مسلسل سیاسی عدم استحکام کا شکار ہے اور کے پی شرما اولی کی حکومت اس سیاسی عدم استحکام کے باعث 14 ویں حکومت ہوگی۔
نیپال میں سیاسی تبدیلیوں اور حکومت کی تشکیل میں مسلسل عدم استحکام کے اثرات عوامی زندگی اور ملکی ترقی پر بھی مرتب ہوتے رہے ہیں۔ نئی حکومت کے سامنے یہ چیلنج ہوگا کہ وہ ملک کو سیاسی استحکام کی راہ پر گامزن کر سکے اور عوام کی توقعات پر پورا اتر سکے۔