بلوچستان: ضلع ڈیرہ بگٹی سے آنے والے سیلابی ریلوں نے پٹ فیڈر کینال اور جوڈھیر شاخ میں 14 شگاف ڈال دیے ہیں۔
جیو نیوز سے گفتگو کرتے ہوئے بلوچستان کے صوبائی وزیر آب پاشی میر صادق عمرانی نے بتایا کہ ڈیرہ بگٹی سے 3 ہزار کیوسک پانی کے ریلے نے پٹ فیڈر کینال، جوڈھیر شاخ، ڈرینج، اور شاہی کینال کو شدید متاثر کیا ہے۔ سیلابی ریلوں کے باعث پٹ فیڈر کینال اور جوڈھیر شاخ میں 14 شگاف پڑ گئے ہیں۔
انہوں نے مزید کہا کہ محکمہ آب پاشی کے عملے نے 12 شگافوں کو بھر دیا ہے، لیکن پانی کے زیادہ بہاؤ کی وجہ سے 2 شگاف ابھی تک پر نہیں کیے جا سکے ہیں۔ پٹ فیڈر کینال کا 30 کلومیٹر کا علاقہ پہلے ہی مٹی اور کیچڑ سے بھر چکا ہے، اور سیلابی ریلے نے مزید مٹی نہر میں ڈال دی ہے۔ صادق عمرانی نے بتایا کہ پٹ فیڈر کینال کی صفائی کے لیے وزیراعلیٰ سے فنڈز طلب کیے گئے ہیں، اور فنڈز ملنے پر صفائی کا عمل شروع کر دیا جائے گا۔
دوسری جانب، بلوچستان کے مختلف اضلاع میں بارش کا سلسلہ جاری ہے، جس کے دوران کہیں ہلکی اور کہیں تیز بارش ہوئی۔ محکمہ موسمیات نے جمعرات کو بلوچستان کے 10 اضلاع میں آندھی اور گرج چمک کے ساتھ بارش کی پیشگوئی کی ہے۔ گزشتہ 24 گھنٹوں کے دوران، کوئٹہ میں 21 ملی میٹر، خضدار میں 3 ملی میٹر، اور لسبیلہ میں 1 ملی میٹر بارش ریکارڈ کی گئی۔
بدھ کو ضلع قلعہ عبداللہ کی تحصیل گلستان کی کلی ملک دین محمد سیگی میں موسلادھار بارش سے ندی نالوں میں طغیانی رہی، جس کے نتیجے میں 2 بچیاں سیلابی ریلے میں بہہ کر جاں بحق ہو گئیں۔