لاہور: قومی کرکٹ ٹیم کے سابق چیف سلیکٹر محمد وسیم نے انکشاف کیا ہے کہ کپتان بابراعظم "بہت ضدی” ہیں اور سلیکشن کمیٹی کی جانب سے تجویز کردہ سکواڈ میں تبدیلیوں کے خلاف اکثر مزاحمت کرتے ہیں۔
مقامی سپورٹس پلیٹ فارم پر دیے گئے انٹرویو میں، محمد وسیم نے کہا کہ سکواڈ میں تبدیلیاں کرنے کے معاملے میں بابراعظم کو قائل کرنا بہت مشکل تھا کیونکہ وہ تبدیلیاں قبول کرنے کے لیے تیار نہیں ہوتے تھے اور ضد کرتے تھے۔
یہ انکشاف اس وقت کیا گیا ہے جب قومی ٹیم ٹی20 ورلڈکپ 2024 کے پہلے راؤنڈ سے باہر ہو گئی ہے اور کپتان بابراعظم کی کپتانی پر شدید تنقید ہو رہی ہے۔ محمد وسیم نے اس دوران بتایا کہ ٹی20 ورلڈکپ کے دوران آل راؤنڈر عماد وسیم کی انجری کو چھپایا گیا۔ انہوں نے کہا کہ ہم اکثر اعظم خان کی فٹنس کے بارے میں بات کرتے ہیں، لیکن عماد وسیم بھی اسی مسئلے کا شکار ہیں اور انہیں اسی وجہ سے سکواڈ سے باہر کیا گیا تاکہ وہ اپنی فٹنس پر کام کر سکیں۔
سابق چیف سلیکٹر نے مزید کہا کہ ٹیم میں چار کوچز کی موجودگی نے مختلف گروپ بنادیے ہیں جو ٹیم کی کارکردگی پر منفی اثر ڈال رہے ہیں۔ انہوں نے بتایا کہ اگر وہ کوچز ٹیم کا حصہ ہیں تو پاکستان کی جیت کی توقع مشکل ہوگی۔ محمد وسیم نے ان کوچز کو ٹیم سے ہٹانے کی کوشش کی لیکن ٹیم انتظامیہ نے انہیں دوبارہ شامل کر لیا۔