ڈونلڈ ٹرمپ کا فائرنگ کے بعد پہلا بیان: "میں محفوظ ہوں اور لڑتا رہوں گا”
فلوریڈا کے ویسٹ پام بیچ میں واقع گالف کلب کے قریب فائرنگ کے واقعے کے بعد سابق امریکی صدر اور صدارتی امیدوار ڈونلڈ ٹرمپ کا بیان سامنے آگیا ہے۔
اتوار کے روز پیش آنے والے واقعے میں ٹرمپ فائرنگ کے وقت گالف کھیل رہے تھے، تاہم وہ محفوظ رہے۔ امریکی میڈیا کے مطابق، ٹرمپ اور فائرنگ کرنے والے شخص کے درمیان تقریباً 400 سے 500 گز کا فاصلہ تھا۔ قانون نافذ کرنے والے اداروں نے جائے وقوعہ سے ایک AK-47 رائفل برآمد کی ہے، اور فائرنگ کرنے والے شخص کی شناخت ریان ویسلے کے نام سے ہوئی ہے۔
سیکریٹ سروس نے حفاظتی اقدامات کے تحت فائرنگ کی، تاہم فائرنگ سے ٹرمپ کو کوئی نقصان نہیں پہنچا۔
اس واقعے کے بعد ڈونلڈ ٹرمپ نے اپنے پہلے بیان میں کہا، "میں بالکل محفوظ اور ٹھیک ہوں۔ اس طرح کے واقعات میرے حوصلے پست نہیں کرسکتے، میں ہمیشہ آپ کے حقوق کے لیے لڑتا رہوں گا اور کبھی پیچھے نہیں ہٹوں گا۔”
یہ واقعہ سکیورٹی خدشات کو مزید بڑھا دیتا ہے، خاص طور پر ایسے وقت میں جب ٹرمپ 2024 کے صدارتی انتخابات میں حصہ لینے کی تیاری کر رہے ہیں۔