چیمپئنز ون ڈے کپ کے دوران فیصل آباد میں ہونے والے میچ میں شاداب خان کی شاہین آفریدی پر غصہ کرنے کی ویڈیو سوشل میڈیا پر وائرل ہوگئی ہے۔
میچ کے دوران بولرز اور بیٹرز کے درمیان غصہ ظاہر کرنا کوئی نئی بات نہیں ہے، خاص طور پر جب بولر بری گیند کروائے یا بیٹر چھکا مارے۔ لیکن حالیہ ویڈیو میں شاداب خان کو اپنے ٹیم کے ساتھی شاہین آفریدی پر غصہ کرتے ہوئے دیکھا گیا ہے، جس نے شائقین کی توجہ اپنی جانب مبذول کرلی۔
اقبال اسٹیڈیم میں لائنز اور پینتھرز کے درمیان ہونے والے اس مقابلے کے دوران، پینتھرز کی ٹیم 46.5 اوورز میں 283 رنز بنا کر آؤٹ ہوگئی۔ لائنز کی ٹیم ہدف کا تعاقب کرتے ہوئے 199 رنز بنا سکی اور شکست کا سامنا کرنا پڑا۔
29ویں اوور کے دوران شاداب نے شاہین آفریدی کو گیند کروائی اور ان پر تلخ جملے کسے۔ تاہم، شاہین نے اس پر کوئی ردعمل نہیں دیا اور خاموش رہے۔ دلچسپ بات یہ ہے کہ اگلے اوور میں اسامہ میر نے شاہین کو صفر پر آؤٹ کر دیا۔
سوشل میڈیا پر اس وائرل ویڈیو پر صارفین نے مختلف تبصرے کیے اور اس واقعے کو معمول کی بات قرار دیا۔ ان کے مطابق میچ کے دوران بولرز کا غصہ کرنا عام ہوتا ہے اور اس میں کوئی غیر معمولی بات نہیں۔
یہ بات بھی قابل ذکر ہے کہ شاہین کی ٹیم لائنز کو مسلسل دوسری شکست کا سامنا کرنا پڑا، اور اس وقت لائنز پوائنٹس ٹیبل پر چوتھی پوزیشن پر موجود ہے۔