بنگلہ دیش کی وزیراعظم حسینہ واجد ملک میں جاری پرتشدد مظاہروں اور آرمی چیف کے عوام کی حمایت کرنے کے اعلان کے بعد ہیلی کاپٹر کے ذریعے بھارت فرار ہو گئی ہیں۔ بنگلہ دیش کے آرمی چیف، جنرل وقار الزماں، اس وقت ملک کی سیاسی قیادت سے بات چیت کر رہے ہیں، جس میں اپوزیشن جماعت ‘بنگلہ دیش نیشنسٹ پارٹی’ بھی شامل ہے۔ ان کی جانب سے دوپہر تین بجے قوم سے خطاب متوقع ہے۔
مقامی میڈیا کے مطابق، ہزاروں مظاہرین وزیراعظم شیخ حسینہ واجد کی سرکاری رہائش گاہ میں داخل ہو گئے ہیں، جبکہ حسینہ واجد کے بھارت فرار ہونے کی اطلاعات ہیں۔ غیر ملکی ذرائع نے دعویٰ کیا ہے کہ حسینہ واجد نے عہدے سے استعفیٰ دینے کے بعد بھارت روانہ ہونے کے بعد ممکنہ طور پر فن لینڈ جانے کے امکانات پر غور کیا ہے۔
یاد رہے کہ بنگلہ دیش میں گزشتہ ماہ طلباء نے ‘مجاہدین آزادی’ کے لیے مختص نوکریوں کے خصوصی کوٹے کے خلاف احتجاج شروع کیا تھا، جو جلد ہی ملک کے 26 شہروں میں پھیل گیا۔ حسینہ واجد نے مظاہروں کو کچلنے کے لیے طاقت کا استعمال کیا، جس کے نتیجے میں متعدد سرکاری عمارتوں کو آگ لگا دی گئی اور تقریباً 200 افراد ہلاک ہوئے۔
حسینہ واجد نے ملک کے بیشتر شہروں میں فوج تعینات کرتے ہوئے کرفیو نافذ کر دیا اور موبائل انٹرنیٹ سمیت دیگر سروسز معطل کر دیں۔ حالیہ مظاہروں کے دوران 94 طلباء ہلاک اور 200 سے زائد زخمی ہوئے ہیں۔