دوحا: امریکی وزیر خارجہ انٹونی بلنکن نے کہا ہے کہ اسرائیلی وزیراعظم نیتن یاہو کے بیانات کے باوجود، اسرائیل غزہ سے اپنی فوج کے انخلا پر آمادہ ہے۔ قطر سے روانگی کے موقع پر صحافیوں سے گفتگو کرتے ہوئے بلنکن نے کہا کہ دوحا میں ہونے والے مذاکرات میں غزہ جنگ بندی معاہدے کے قریب پہنچنے پر اتفاق کیا گیا ہے، جس میں اسرائیلی ڈیفنس فورسز کے غزہ سے انخلا پر بھی بات چیت کی گئی۔
بلنکن نے وضاحت کی کہ اسرائیلی ڈیفنس فورسز کے انخلا کے شیڈول اور مقام کے تعین سے متعلق معاہدہ مکمل طور پر واضح ہے، اور اسرائیل نے اس پر رضامندی ظاہر کر دی ہے۔ انہوں نے گزشتہ ہفتے مذاکرات میں طے پانے والے نکات کی تفصیلات بتانے سے گریز کیا، مگر کہا کہ جنگ بندی معاہدہ تیار ہے اور اس پر تین مراحل میں عمل درآمد کیا جائے گا، جن میں غزہ سے اسرائیلی فوج کا انخلا بھی شامل ہے۔
انٹونی بلنکن نے یہ بھی بتایا کہ اسرائیلی وزیراعظم نے ملاقات کے دوران انہیں امریکی تجویز کردہ جنگ بندی معاہدے پر رضامندی کے حوالے سے آگاہ کیا تھا۔