بھارت کے ریاست اترپردیش میں پیش آنے والے ایک حیرت انگیز واقعے میں بندروں نے ایک 6 سالہ کمسن بچی کو درندہ صفت شخص کے حملے سے بچا لیا۔ بھارتی میڈیا رپورٹس کے مطابق باغپت کے علاقے میں ایک شخص نے بچی کو بہلا پھسلا کر اپنے ساتھ لے جانے کی کوشش کی اور موقع ملتے ہی اسے برہنہ کردیا۔
بچی کے والد نے پولیس کو بتایا کہ ان کی بیٹی گھر کے باہر کھیل رہی تھی جب ایک نامعلوم شخص اسے باتوں میں لگا کر گلی کے اندر لے گیا۔ سی سی ٹی وی فوٹیج میں اس شخص کو بچی کے ساتھ جاتے ہوئے دیکھا گیا۔ جب بچی گھر واپس آئی تو اس نے اپنے والدین کو بتایا کہ وہ شخص اسے نقصان پہنچانے کی نیت رکھتا تھا لیکن اسی دوران بندروں نے اس پر حملہ کردیا، جس کی وجہ سے وہ ڈر کر بھاگ گیا اور بچی کو وہیں چھوڑ گیا۔
بچی کے والد کے مطابق ملزم نے ان کی بیٹی کو دھمکی دی تھی کہ اگر وہ اس کے ساتھ نہ گئی تو وہ اس کے والد کو قتل کر دے گا۔ والد نے کہا کہ اگر بندروں نے حملہ نہ کیا ہوتا تو ان کی بیٹی بڑی مشکل میں پھنس جاتی۔
پولیس نے واقعے کی تفصیلات درج کر لی ہیں اور ملزم کی شناخت اور گرفتاری کے لیے تفتیش شروع کر دی ہے۔ پولیس کا کہنا ہے کہ ملزم ایک نوجوان لڑکا دکھائی دیتا ہے اور ممکنہ طور پر کسی قریبی گاؤں سے تعلق رکھتا ہے۔
یہ واقعہ اس بات کی ایک حیران کن مثال ہے کہ قدرتی عناصر کس طرح انسانی جانوں کو بچانے میں اہم کردار ادا کر سکتے ہیں۔