کراچی میں گرمی کی شدت کو کم کرنے والی سمندری ہوائیں بحال ہو گئی ہیں۔
چیف میٹرولوجسٹ سردار سرفراز نے کراچی میں سمندری ہواؤں کی بحالی کی خوشخبری دی۔ انہوں نے کہا کہ شہر میں ہوا کے کم دباؤ کی وجہ سے سمندری ہوائیں معطل ہو گئی تھیں، مگر کل شام سے یہ ہوائیں دوبارہ بحال ہو چکی ہیں۔
سردار سرفراز نے وضاحت کی کہ آج کراچی کا موسم جولائی کے دنوں کے مطابق ہے، جو عموماً ابر آلود اور سمندری ہواؤں کے ساتھ ہوتا ہے۔ آج صبح سے شہر میں 15 سے 18 کلو میٹر فی گھنٹہ کی رفتار سے ہوائیں چل رہی ہیں۔
انہوں نے مزید بتایا کہ آج صبح مون سون کے اسپیل کی وجہ سے لاہور، گوجرانوالہ اور جہلم سمیت پنجاب کے مختلف شہروں میں موسلادھار بارش ہوئی ہے۔ موجودہ اسپیل کے تحت بارش کا سلسلہ 3 سے 4 دن تک جاری رہنے کا امکان ہے، اور اس دوران رات یا صبح سویرے تیز بارش کی توقع ہے۔