پشاور:(ملتان ٹی وی ایچ ڈی) خیبرپختونخوا میں بلدیاتی نمائندوں کے اعزازیے میں اضافہ کر دیا گیا ہے۔ نئی دستاویزات کے مطابق، تحصیل میئر اور چیئرمین کا اعزازیہ 100 فیصد بڑھایا جائے گا، جس کے تحت تحصیل میئر کا اعزازیہ 40 ہزار سے بڑھا کر 80 ہزار روپے کر دیا جائے گا۔ اسی طرح، نیبر ہڈ کونسل اور ویلیج کونسل چیئرمین کا اعزازیہ 20 ہزار سے بڑھا کر 30 ہزار روپے کیا جائے گا۔
خیبرپختونخوا لوکل گورنمنٹ منتخب نمائندوں کی اجرت اور الاؤنس رولز 2022 میں تبدیلی کی گئی ہے، اور اس اضافے کا مقصد بلدیاتی نظام کو مزید مستحکم کرنا ہے۔ محکمہ خزانہ نے تحصیل میئر کے اعزازیے کے لیے سالانہ 344 ملین روپے سے زائد مختص کرنے کا اعلان کیا ہے، جبکہ نیبر ہڈ کونسل اور ویلیج کونسل چیئرمین کے اعزازیے کے لیے 2 ہزار 412 ملین روپے مختص کیے جائیں گے۔
بلدیاتی نمائندوں کے دفاتر کے لیے ماہانہ کرایوں کی مد میں بھی فنڈز جاری کیے جائیں گے، جس سے ان دفاتر کی مالی حالت بہتر ہو گی۔