کوئٹہ: موسیٰ خیل کے علاقے راڑہ شم میں 23 مسافروں کو گاڑیوں سے اتار کر سفاکی سے قتل کر دیا گیا۔
ایس ایس پی موسیٰ خیل، ایوب اچکزئی کے مطابق، حملہ آوروں نے بین الصوبائی شاہراہ پر ناکہ لگا کر مسافروں کو ٹرکوں اور مسافر بسوں سے اتارا اور انہیں فائرنگ کر کے قتل کر دیا۔ ایوب اچکزئی نے مزید بتایا کہ حملہ آوروں نے 10 گاڑیوں کو بھی نذر آتش کر دیا۔ پولیس اور لیویز نے موقع پر پہنچ کر لاشوں کو اسپتال منتقل کیا، اور واقعے کی تحقیقات کا آغاز کر دیا گیا ہے۔
ترجمان حکومت بلوچستان، شاہد رند نے اس واقعے کی مذمت کرتے ہوئے کہا کہ موسیٰ خیل کا علاقہ ڈیرہ غازی خان سے متصل ہے اور چھوٹی شاہراہوں پر عام طور پر سکیورٹی کا انتظام کم ہوتا ہے۔ دہشتگردوں نے رات کی تاریکی کا فائدہ اٹھاتے ہوئے یہ حملہ کیا۔
وزیراعلیٰ بلوچستان، میر سرفراز بگٹی نے بھی اس دہشتگردی کے واقعے کی شدید مذمت کی ہے۔ انہوں نے جاں بحق افراد کے لواحقین سے دلی تعزیت کا اظہار کرتے ہوئے کہا کہ حکومت دہشتگردوں اور ان کے سہولت کاروں کا پیچھا کرے گی، اور انہیں عبرتناک انجام تک پہنچایا جائے گا۔