کراچی: معروف ٹی وی اداکار مظہر علی انتقال کر گئے۔ مرحوم کے اہلخانہ کے مطابق، مظہر علی دل کی بیماری میں مبتلا تھے اور نجی ہسپتال میں زیر علاج تھے۔ ان کی نماز جنازہ آج مغرب کے بعد طیبہ مسجد، ناظم آباد نمبر 3 میں ادا کی جائے گی۔
مظہر علی حال ہی میں پاکستان واپس آئے تھے، جبکہ ان کی فیملی کینیڈا میں مقیم ہے۔ ان کی ہمشیرہ، اہلہ عمران نے بتایا کہ مظہر علی کافی عرصے سے علیل تھے اور ان کا انتقال سوتے ہوئے ہوا۔ انہوں نے مزید کہا کہ مظہر علی صحت کی خرابی کی وجہ سے ٹی وی چینلز پر کام نہیں کر سکے۔
مظہر علی نے این ای ڈی یونیورسٹی سے سول انجینئرنگ میں بیچلرز کی ڈگری حاصل کی تھی۔ ان کے مشہور ڈراموں میں "شاہین”، "خدا اور محبت”، "ہالا”، "انتظار کر بھی”، "تعبیر”، "عروسہ”، "بادلوں پر بھروسہ” اور "افشاں” شامل ہیں۔ ان کی وفات نے شائقین اور ساتھی اداکاروں میں گہرا دکھ پیدا کیا ہے۔