نارووال (مانیٹرنگ ڈیسک – 25 دسمبر 2023ء): میں سینئر لیگی رہنما احسن اقبال نے کہا ہے کہ نواز شریف پاکستان کی 24 کروڑ عوام کا لاڈلہ ہیں۔ انہوں نے نارووال میں میڈیا کے ساتھ گفتگو کرتے ہوئے کہا ہے کہ نواز شریف نے ہمیشہ عوام کے درد کو محسوس کیا ہے اور ملک اور عوام کی ترقی کے لئے کام کیا ہے۔ احسن اقبال نے مزید کہا کہ نواز شریف کا خواب ہے پاکستان کی معیشت کو بھی ناقابل تسخیر بنانا۔
انہوں نے یہ بھی کہا کہ نواز شریف کے خوابوں کو ہمیشہ مکمل نہیں ہونے دیا گیا ہے۔ مسلم لیگ (ن) کے مرکزی سیکرٹری جنرل احسن اقبال نے کہا ہے کہ پی ٹی آئی الیکشن میں اپنی متوقع شکست سے بچنے کیلئے دھاندلی کا شور مچا رہی ہے۔
احسن اقبال نے نارووال کے حلقہ این اے 76 سے کاغذات نامزدگی جمع کروا دیئے اور کارکنان سے خطاب میں ان کا کہنا تھا کہ جنرل الیکشن 2024 صاف شفاف ہوں گے، 9 مئی کے واقعات میں ملوث افراد کے خلاف کارروائی کا انتخابی عمل سے کوئی تعلق نہیں ہے۔
انہوں نے کہا کہ پی ٹی آئی کارکنان کے خلاف ریاستی جرم کرنے پر کارروائی کی جا رہی ہے اور 8 فروری کو ہر قیمت پر انتخابات ہوں گے۔ انتخابات کے حوالے سے سپریم کورٹ بھی واضع حکم دے چکی ہے، انتخابات کے عمل میں رکاوٹ ڈالنے کے لئے پی ٹی آئی مختلف حربے استعمال کر رہی ہے، پی ٹی آئی کی کوشش ہے کہ انتخابات نہ ہوں۔ احسن اقبال نے مزید کہا کہ پاکستان میں جمہوریت کے نام پر گھنانا کھیل کھیلنے کی اجازت نہیں دیں گے، پی ٹی آئی کے پاس صرف دو راستے ہیں، اپنے کیے پر عوام سے معافی مانگے اور مفرور عدالت میں پیش کرے، ہم تمام پارٹیوں کے لوگوں کو ساتھ لے کر چلنا چاہتے ہیں۔