پنجاب: پی ڈی ایم اے نے دریائے سندھ کے ملحقہ اضلاع کے لیے فلڈ وارننگ جاری کر دی۔
صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے دریائے سندھ سے ملحقہ اضلاع میں فلڈ وارننگ جاری کر دی ہے۔ پی ڈی ایم اے نے کمشنر سرگودھا، ڈیرہ غازی خان، اور کمشنر بہاولپور کو الرٹ جاری کر دیا ہے، اور ڈی سی میانوالی، بھکر، لیہ، مظفرگڑھ، راجن پور، اور رحیم یار خان کو بھی خبردار کر دیا ہے۔
ترجمان پی ڈی ایم اے کے مطابق، دریائے سندھ میں سیلابی صورتحال چند دنوں تک برقرار رہنے کا امکان ہے۔ تربیلا اور کالا باغ کے مقام پر نچلے درجے کا سیلاب ہے، جبکہ چشمہ اور تونسہ کے مقامات پر درمیانے درجے کی سیلابی صورتحال دیکھنے کو مل رہی ہے۔
ڈی جی پی ڈی ایم اے، عرفان کاٹھیا، نے ہدایت کی ہے کہ ریسکیو 1122 کی رسپانس ٹیموں کو ہائی الرٹ رکھا جائے اور دریاؤں کے کنارے مقیم لوگوں اور مویشیوں کا انخلا یقینی بنایا جائے۔
شہریوں سے کہا گیا ہے کہ ایمرجنسی کی صورت حال میں پی ڈی ایم اے کی ہیلپ لائن 1129 پر رابطہ کریں۔