نیویارک: صدارتی امیدوار ڈونلڈ ٹرمپ اور ارب پتی ایلون مسک کے درمیان حالیہ نزدیکی روابط اور ایک دوسرے کے حق میں بیانات سیاسی تجزیہ کاروں کے لیے حیرت کا باعث رہے ہیں۔ اب قیاس آرائیوں کا سلسلہ اس وقت ختم ہوگیا جب سابق امریکی صدر نے کہا کہ اگر وہ دوبارہ صدر منتخب ہوتے ہیں تو وہ ایلون مسک کو کابینہ میں ایک اہم عہدہ پیش کرنے کی پیشکش کریں گے۔
غیر ملکی خبررساں ادارے ‘رائٹرز’ کے مطابق، ٹرمپ نے ایک سوال کے جواب میں کہا کہ اگر ایلون مسک ان کی پیشکش قبول کرنے کے لیے تیار ہیں تو وہ ایسا کرنے کو تیار ہیں۔ ٹرمپ نے ایلون مسک کو "بہت ذہین آدمی” قرار دیا اور کہا کہ وہ یقینی طور پر انہیں کابینہ میں اہم عہدہ دیں گے۔
گزشتہ ماہ ایلون مسک نے صدر کے طور پر ٹرمپ کی حمایت کی تھی اور ایک قاتلانہ حملے میں بچ جانے کے بعد ٹرمپ کی "ہمت” کی تعریف کی تھی۔ دونوں نے اس ماہ کے آغاز میں ارب پتی پلیٹ فارم ایکس پر دوستانہ گفتگو کی اور مسک نے ٹرمپ کی مہم کے لیے اپنی حمایت کا اعادہ کیا۔
یہ پہلا موقع نہیں ہے کہ مسک کو ٹرمپ انتظامیہ کے تحت مشیر یا کابینہ کے عہدے کی پیشکش کی گئی ہو۔ 2016 میں، ٹرمپ کے منتخب ہونے کے بعد، مسک کو ریپبلکن صدر کی دو مشاورتی کونسلوں میں شامل کیا گیا تھا، جہاں ان کا مقصد ماحولیاتی اور امیگریشن پالیسیوں پر اثر انداز ہونا تھا۔ تاہم، ٹیک ارب پتی نے 2017 میں ٹرمپ کے تاریخی پیرس موسمیاتی معاہدے سے امریکہ کو نکالنے کے فیصلے کے بعد استعفیٰ دے دیا تھا۔