اسلام آباد: صدر آصف علی زرداری نے الیکشن ترمیمی بل 2024 پر دستخط کر دیے، بل اب باقاعدہ ایکٹ بن گیا۔
صدر مملکت آصف علی زرداری نے گزشتہ رات الیکشن ایکٹ ترمیمی بل 2024 پر دستخط کر دیے ہیں، جس کے بعد یہ بل باقاعدہ قانون بن گیا ہے۔ اس بل کا گزٹ نوٹیفکیشن آج جاری کیے جانے کا امکان ہے۔
الیکشن ایکٹ ترمیمی بل 2024 کو گزشتہ روز قومی اسمبلی اور سینیٹ دونوں ایوانوں سے کثرت رائے سے منظور کیا گیا۔ اس دوران، اپوزیشن ارکان نے شدید احتجاج کیا اور نعرے بازی کی۔ پاکستان تحریک انصاف (پی ٹی آئی) کے رہنماؤں نے اس بل کی منظوری پر شدید اعتراض کرتے ہوئے کہا کہ یہ اقدام سپریم کورٹ کے فیصلے پر حملہ ہے، کیونکہ ایک ادارے کی جانب سے دوسرے ادارے کو دبانے کی کوشش کی گئی ہے۔
یہ ترمیمی بل، جو 12 جولائی کے سپریم کورٹ کے مخصوص نشستوں کے فیصلے کے بعد لایا گیا ہے، میں دو اہم ترامیم شامل ہیں:
- کوئی رکن اسمبلی اپنے پارٹی سرٹیفکیٹ کو تبدیل نہیں کر سکتا۔
- مخصوص نشستوں کے حصول کے لیے ضروری ہے کہ کسی جماعت نے وقت پر فہرست جمع کروا رکھی ہو۔
یہ ترامیم الیکشن ایکٹ 2017 کے سیکشن 66 اور 104 میں متعارف کروائی گئی ہیں اور اب فوراً نافذالعمل ہوں گی۔ تحریک انصاف کے چیئرمین بیرسٹر گوہر نے اس بل کی منظوری کے خلاف سپریم کورٹ میں چیلنج بھی کیا ہے۔